Cumar bin Khataab Allaha ka raalli noqdee marka agtiisa lagu xuso Abuubakar Allaha ka raalli noqdee wuxuu oran jiray Abuubakar waa sayidkeena wuxuuna xorreeyay sayidkeena isagoo u jeeday Bilal.

Bilal bin Rabbaax oo ahaa mu'adinkii Islaamka wuxuu ahaa nin aad u madow oo caato ah mana maqli jirin erayada lagu amaani jiray, marka la amaanayona hoos buu eegi jiray isagoo oran jiray waxaan ahay nin xabbashi ah shalayna waxaan ahaa nin addoon ah.

Laga bilaabo xilligii uu Islaamku bilawday ilaa maalinkan maanta ah waxaa tobankii qofoodba oo muslimiinta ka tirsan, toddoba ka mid ahi waxay garanayaan Bilal sida ay u garanayaanba labadii khaliif ee geesiyaasha ahaa oo Abuubakar bin saddiiq iyo iyo Cumar bin Khataab.

Qofkii la weydiiyo oo la yiraahdo ma garanaysaa Bilal wuxuu durba ku leeyahay waa mu'adinkii rasuulka, waa addoonkii sayidkiisa ku silcinaayay dhagaxa laguna oran jiray ku dhawaaq oo tuug Ilaahyada aan caabudno ee Laata iyo Cuza, Bilaalna ugu jawaabi jiray: AXAD..AXAD, markaasay dhibka ku saa'idi jireen kuna oran jireen ku dhawaaq waxa aan caabudno, markaasuu Bilal oran jiray: carrabkaygu ma karo kumana wanaagsana waxa aad sheegaysaan ee wuxuu karaa in uu yiraahdo: AXAD..AXAD, waxay markii danbe ku yiraahdeen dheh Rabbigaygu waa Laata iyo Cuza dhibkaaga waan ku daalnayee, markaasuu Bilal isagoo aad u dhibaataysan madaxa u ruxay oo uu yiri: AXAD..AXAD.

Abuubakar bin Siddiiq ayaa u tagay meeshii lagu silcinaayay Bilal markaasuu yiri isagoo qaylinaaya: ma waxaad dilaysaan nin leh Rabbigay waa Allah, markaasuu Ummayah qayliyay kuna yiri: ku qaado wax ka badan qiimihiisa xorna ka dhig, Abuubakar r.c. markuu iibsaday isla markiiba xor buu ka dhigay Bilal.

Markuu Islaamay Bilal waxaa argaggaxay ninkii uu la joogay oo sayidkiisa ahaa lana oran jiray Ummayah bin Khalaf iyo iyo reer banii Jamaxba waxaana ku dhacay hoog iyo ceeb iyagoo la yaab la noqotay in addoonkoodu uu Islaamay nebi Muxammadna uu raacay,rasuulkana wuxuu u doortay in uu noqdo mu'adinka Islaamka.

Ummaya wuxuu ku dhintay gacantii Bilal, wuxuuna Bilal yiri markuu uu dilaayay Ummaya oo uu seefta gelinaayay: AXAD..AXAD

Bilal wuxuu guursaday Cabduraxmaan walaashiisa oo la oran jiray Haala wuxuuna Bilal ku geeriyooday Shaam.

Rabi haga Raali noqdo Bilaal Bin Rabaax.

Wabilaahi Tawfiiq.